لما يكون الانسان محتار ومش عارف يوصل لقرار خاصة لو القرار ده ممكن يغير مجرى حياته جواه صراعات غريبة وعجيبة ..وبيفضل السؤال المنطقى الوحيد ساعتها:احتمالات المكسب والخسارة اد ايه؟ دا على رأى رجال الاعمال طيب نقدر نقول ان المكسب أو النجاح اللى ممكن الانسان يحققوا فى حياته بالطبع ليه معايير واكيد المعايير دى نسبية يعنى مش ثابتة عند كل الناس ومش واحدة يعنى فى ناس بتشوف النجاح فى الفلوس وناس تانية بتشوف النجاح فى الشهرة والنجومية وفى ناس تانيين خالص مكاسبهم بسيطة قوى وعلى اد الحال يعنى نجاحهم بيكون محصور فى الاستقرار والبيت والعيلة وكده وفى ناس بقى مش بيحسبوها خالص نقدر نقول انهم عايشين كده وخلاص يعنى مالهومش اى طموح ولا أى حسابات للخسارة والمكسب والكلام ده نيجى بقى لمربط الفرس وهو أيهما احسن نحسبها ونشوف هانكسب اد ايه وهانخسر كام ولا مش مهم وادينا عايشين لحد وقت قريب قوى كانت هى دى الصراعات اللى جوايا انا رايحة فين ووصلت لايه وعايزة ايه من الدنيا تحديدا وايه اللى حققته وايه اللى كان نفسى احققه ومتحققش وحاجات من اللى بتقع تحت بند الامانى والاحلام والاهداف الى اخره وكنت كتير اقول لنفسى اكيد بكره احسن أكيد فى امل هو انا ليه مستعجلة وتراكمت جوايا احلام كتيرة قوى عملتلى ضغوط نفسية ولفترة كده عملت نفسى مطنشة ومش واخدة بالى من ان بكره مجاش احسن وانى مش مستعجلة ولا حاجة وان فيه سنين كتيرة قوى عدت من ادامى وانا واقفة محلك سر وبصراحة يعنى كنت مرتاحة قوى وانا مطنشة طب انا كنت ممكن اعمل ايه وكل محاولة باعملها لتحقيق احلامى كانت مصيرها الفشل ولينا حدوتة فى الموضوع ده المهم بقى وزى علماء النفس ما بيقولوا تجاهل الشىء بيكون فى احيان كتير عواقبه اكتر من مواجهته والتعامل معاه وبالتالى كانت النتيجة المنطقية انه وبدون اى مقدمات اضطراب نفسى وحالة تشويش رهيبة ادت الى اكتئاب حاد أدى الى عزلة وانطواء وفجاة لقتنى عايزة اسيب كل حاجة واتخلى عن احلامى واهرب بعيد حسيت وقتها بجد انى تعبت من كتر الجرى اللى ماوصلنيش غير للتعب وبس وحاجات بقى كتيرة مش عايزة يعنى انكد عليكم انا بقى باقول كل ده ليه عشان بعد التجربة اللى مريت بيها اتاكدت ان الانسان لازم يواجه وميهربش وميطنش ويتعامل مع الواقع بس من غير مثالية زايدة يعنى يعرف كويس انه ممكن ميحققش احلامه وراد طبعا بس اكيد انه اتعلم كتير وخبرته بقت احسن والاهم بقى من دا كله ان ربنا هايعوضوا فى الاخرة لانه اكيد مش هايتساوى الفريقان وعشان كده انا باقول لكل واحد على ارض البلد دى لازم تواجه لازم تدافع عن احلامك وطموحاتك ولازم كمان يكون عندك صبر واكيد هاتلاقى الاجر سواء فى الدنيا ودا جزاء بسيط اوى او فى الاخرة وما عند ربك خير وأبقى وفى حاجة عايزة اقولها كمان سهل قوى انك تحلم والاسهل انك تحاول تحقق الحلم لكن الصعب انك مش تتخلى عن حلمك لو الدنيا كلها وقفت ضدك اكون او لا اكون خالى ده مبدأك حتى لو هاتموت عشان تحافظ عليه |
