هو مجرد حلم
حلم حلمته زمان ..زمان قوى..أيام ما كنت باشوف العتمة نور.....
وجوه قلبــى كنت زارعة جنايـــن أمـــل..بتطرح كل يوم بستان.....
حلمت لما كان البال خالى والقلب مليان حب لكل الناس أى ناس ..
ده أيام ما كانوا الناس لسه ناس ..............
بيخافوا فعلا على بعض ومبيجرحوش فى بعض..
حلمت حلمى وسط اللمة وسط الدفا وسط ناس عيونها مليانة حنية..حنية ناس زمان
..أيوه ناس زمان زمان اللى كانت احلامى فيه بسيطة وبريئة ..
حلم بنت بضفاير شايفة الدنيا حلو
وحلمت تحقق الحلم .اه نسيت اقول على الحلم
الحلم فى انى اكون انسانة ..انسانة بجد ..لما تحب يبان فى عنيها ..
ولما تكره تسامح ..
ولما تغضب تثور..
ولما تنسى تقول يارب.
.ولما الدنيا تضيق بيها ترضا..
ولما تنام تحلم بالجنة ..
ولما تصحى تحمد ربها...
حلمت يكون لى بيت وعيلة..
وحضن يضمنى لما أخاف...
.وعيون لما ابصلها أحس بالامان
..وقلب يخطفنى لجزيرة ما فيهاش إنسان..
وايدين تطبطب وتدواى جرح الزمان ..
وصوت الحق يصرخ ويملا الفضا ..
ولما ابرد قوى الاقى فى حضنه الغطا ..
حلمت ألاقى فى كل خطوة امشيها امل فى بكرة..
واتخطى حدود الفكرة ..
أصلى كنت عشمانة..حتى حلمت بعشم ....
حلمت........ وحلمت ........وحلمت
وطلع كله فى الآخر
كان مجرد حلم...